أسعدكم الله
هذه الأبيات يبدو حظها بالطرح أفضل
لدي قصائد بعضها له أكثر من شهر وما نزلت وهذه الأبيات
يبدوا عندها واسطة قوية فجاتكم مباشرة علها تروق لكم
يازين ياللي مالك الزين كله...=أشغلت قلبي بالغرام وتعنا...
غلاك فيني كل عرقٍ(ن)يتله...=ما فيه عرقٍ(ن)بالجسد ما يونا...
ليتك تركت القلب يسكن محله...=ما كان هذا الليل حالي معنا...
أما توكل حلله وإستحله...=اغمس يدينك بالنزيف وتحنا...
وإلا تجمل رد سيفٍ(ن)تسله...=على شوارد حلم منا ومنا...
ابرا لطيفك كني اليوم ظله...=مجروح قلبي ما لحق ما تمنا...
كان يتمنى تصبح بيوم خله...=لكن حسافة بالحلم ما تهنا...
ينزف قصيد وخابرك ما تمله...=الله يسامح زينك اللي فتنا...
قلت لك:فل حجاج خاطرك فله...=صديت وجهك يا أريش العين عنا...
جئتك بخاطر منشرح قلت:لله...=مالك مكان أرجوك لا تمتحنا...
ما تدري إن الحب في كل مله...=مشروع لكن قهر صدك غبنا...
عقبت في قلبي بذا الرفض عله...=يقعد سنين بعلته ما رحمنا...
زدت الجروح جروح ماهي مجله...=غوائرٍ(ن)من خلف عوجٍ(ن)تحنا...
على خفوقٍ(ن)ما رحم زين ذله...=طعنه بالصدة بعد كان حنّا...
مبروك يا قلبي على الجرح شله...=لا هو كسب عزه ولا احنا كسبنا...
كل الأماني عايدة مضمحله...=نبي مكاسب بالغرام وخسرنا...
يازين عذر واترك الحب خله...=أحلامنا تعبت وحنا تعبنا...
يازين ياللي مالك الزين كله...=أشغلت قلبي بالغرام وتعنا...