أسعدكم الله
بالأمس القريب كتبت بمناسبة اليوم الوطني
واليوم أطرح ساهر ... عل نحظى بمكرمة ملكية تعدل نظامه
بصورة تتناسب مع دخل المواطن البسيط لا المواطن المقتدر
القصيدة تعبر عن حالها
تكفى يابو متعب بعد ما تعبنا=تزيح كابوسٍ(ن)على قلوبنا حل
تفزع لنا من عقب ساهر سلبنا=تكفى ترى مطلوبنا تحكم بعدل
إرهاب ساهر يا ملكنا رهبنا=هدفه واضح يأخذ اللي نحصل
قسيمته أعلى من اللي جلبنا=وإن كان ما سددت شهر وتدبل
ساهر يابو متعب نظامه نكبنا=الفقر زاده فقر والوضع مختل
التاجر اللي جاب ساهر نهبنا=وأهل المصالح لأجل عينه تطبل
بأرزاقنا ساهر لك الله حربنا=الرزق قطعه يشبه لفتنة القتل
ما شيء من ساهر بربي كسبنا=إلا الخسائر والحوادث مسلسل
شبابنا ما عاد تقضي طلبنا=فوق البطالة دين وشبيتحمل
وليا اشتكينا يا ملكنا نشبنا=الحل ندفع غيرها مابها حل
لو هو صدقنا قالوا انا كذبنا=بلمسة زرار اللي يبونه يعدل
على الوساطة والتحايل غصبنا=وإلا تهربنا سبب حاجة وقُل
الراتب اللي نأخذه لو حسبنا=ما يكفي يسدد قسائمه يا عل
الله يفقرْ من يدور تعبنا=اللي جبرنا يا ملكنا على الذل
تكفى يابو متعب بعد ما تعبنا=تزيح كابوسٍ(ن)على قلوبنا حل