يا خوي الطريق اللي جمعنا مساره=اختلف جونا من بعد هب العواصف
إن مشينا يمينه وإن مشينا يساره=خطو الأقدام مكتوبٍ(ن)عليها تخالف
ذي خسارة كبيرة ما بعدها خساره=حكم الأقدار ما يحسب حساب الموالف
بعد حلو الليالي ذقت طعم المراره=كن الأيام موكولة تزيل التعارف
كن للوقت ثأر وجاي يأخذ بثاره=حين بعد خطاوينا بليا مصادف
أقبلت وأنكفت وشلون هذا العباره=حظنا والليال الغبر اقامت تحالف
ما توقعتها تسرع كذا بإستداره=قبل نقضي حوايجنا وكل السوالف
الزمن يا خويي غصب ينفذ قراره=دبرة الله فينا وأنت بالحال عارف
خاطري يا رفيق العمر بان انهياره=سيل قهر الزمن يا منية الروح جارف
حل بالصدر ضيق وبان فيه انكساره=والفكر حار بالتصريف من حال شايف
لو الأوضاع تمشي بالذكاء والشطاره=كان سهلت للقيا بكل المواقف
ليت لي مقدره بالجو وإلا غباره=كان صفيت جو أعمارنا بالعواطف
مير الأوضاع صعبة كل حيٍ(ن)بداره=والطريق الموصل بيننا شبه تالف
يا خوي الطريق اللي جمعنا مساره=اختلف جونا من بعد هب العواصف