يابندر الجودي زبون المهمات=عساك طيب يا رفيق الزمانا
سلم على علي(1)وقل له سلامات=وش ذكره فينا بعد ما نسانا
راحت سنين ولا سمعنا تحيات=واليوم من بعد المغيبة لفانا
وقل له ترى الأيام عدله وعوجات=لكنها ما غيرت مستوانا
حنا كما كنا على كل الأوقات=ما نحني رقاب الكرامه ورانا
نأخذ ونعطي من كرمنا كرامات=ولا نقصر الأقدام عن من دعانا
أصحابنا ياكثرهم بالسعوات=ويا قلهم كان الزمان احتدانا
أكثر هل الدنيا مطبل وشمات=دنيا غرورة مالها من ضمانا
هيهات يابندر على كل ما فات=راحت سنين ولا لحقنا هوانا
واليوم نتعب من قيام الصلوات=بعد النشاط اليوم قصرت خطانا
وشلون يا بندر نسوي قربات=راحت على ما قيل والله علانا
ما عاد فينا غير هيهات هيهات=ماهو حصل لأجدادنا عاد جانا
يالله يا عالم جميع الخفيات=تغفر لنا يا رب واقبل دعانا
يارازق الأحياء ويارب الأموات=يارب لا تقطع بعفوك رجانا
ياخالق الأكوان رب السموات=يامطلع بالحال سر وبيانا
تختم لنا بالمغفرة والشهادات=وتستر علينا برحمتك ماعصانا
يابندر الجودي زبون المهمات=عساك طيب يا رفيق الزمانا