أسعد الله أوقاتكم
اليكم الأبيات علها تروق لكم
يالله ياللي مرسل الغيث بالخير=كل ما خلقته معتني به ورازقه
يا مجري الأقدار رب المقادير=يا حافظٍ(ن)للقلب داخل معالقه
شفت السحاب اللي مزونه مزابير=حرك لقلبي صوت رعده وبارقه
الرعد كنه ونة الصدر ما غير=والبرق كنه خد خلٍ(ن)مفارقه
شفته قبل عامين في حزة عصير=من يومها والشوق بالقلب حارقه
جئيته مسيير حسب سلم المسايير=الشوق فيني رافع أعلى بيارقه
عامين تلعب بالعقول التفاكير=بعد الفراق اللي على الصدر طابقه
أتعبت حالي بالحكي والمشاوير=الحظ عاثر رب الأرباب ماحقه
وأتعبت طاروق الشعر والمجارير=واللي طرق للقلب لا زال طارقه
كن المواجع تطرقه بالمسامير=الحال ينزل جرح الأيام سارقه
ما عاد ينفع فيه مشرط وتخدير=وشلون يبرى جرح بالقلب عانقه
ولا عاد ينفع فيه نصحٍ(ن)وتحذير=كن القهر في داخل القدر سالقه
فات الأوان ولا تفيد المعاذير=كل ما حلي اليوم للخلف فاهقه
يالله ياربي عليك التدابير=تلطف بحال القلب من هم لاحقه
يا رب غيث القلب بالصبر والخير=كل ما خلقته معتني به ورازقه