ينومسني ويفرحني ليا كثروا رجال ثبيت=الا ياالله تجعل جمعهم جمع(ن) على الطاعه!
الا وين العميل اللي يجاريني على هاالبيت= نبا ناخذ ونعطي في رحاب العز لو ساعه!

علامك يالمطوع قبل يذن قمت ثم صليت=قصرت الفرض قبل الكبتن يحدد إقلاعه
سمعتك ياعميل الخير تنخا ثبيت ثم لبيت=نبا ناخذ معك فصلين صيفية ومرباعه

انا موفي فروض الدين وانته ياعساك اوفيت= لكن احذر من الحايه على مركبك وشراعه
اللي عدة سنين انخى ودوبك يارفيقي جيت= لكنك بعد جيت افرح بغايبنا ومرجاعه

يقولون المطوع يخلط السكر مع الحلتيت=وأنا قول المطوع ضاربه من وقتنا راعه
ليامن شاف له إثنين كنه راكبه عفريت=مخبي له جهاز وشابكن بذنيه سماعه

ترى سمعة رجال الدين ترقى في شفا قرنيت= ليا شديت حيلي صابتك في ماقفك ماعه
نخش ونفرع الهيه ونلزم راعي الشربيت= يجر بغاربه والرجل تربط في طرف شاعه

الا يا أصحابنا لا تشعلون النار بالكبريت=ترى الإسلام ياقوم اللحا ماهذي طباعه
ليا كثر الخطأ ماني بقابل عذر لو سويت=ترى العربان ما تسمع عمى يهش مقشاعه

ترانا ياوسيع العرف فاهمين وطيبين الصيت= علامك شايل(ن) شونك وتقرع لك بقرقاعه
تعاتبني تقلي صار فالموضوع كيت وكيت= انا احسبكم رجال تدافعون وعندكم ناعه

تسوون المصيبة تحسبون المنفعة تنكيت=ترى ما كل تفجيرة بحسب العرف طرطاعه
ترى حسن الخلق ينفعك لكنك عنه زليت=ولا يردعك لين تطب لك في قوم قطاعه

ليا منه غلط واحد تتريقتوا براع بشيت= وصبيتوا علانا هوشة(ن) من دون فراعه
انا ماازل درب الحق لكنك يابو تشميت= تبانا نستهين بديننا مع كل دراعه

من المشرق ليا المغرب تذكر كم عين أبكيت=ودائم حجة المفلس يحط الدين شماعه
ترى الإسلام حرم غيبة المسلم مع التصنيت=وهذا خصلة فيكم يا مال القوم والضاعه

على وضح النقا نربا المخالف يوم ماربيت= ترى راع الرعيه دايم(ن) الذيب فاسناعه
تقدم لك بحجه مالها ياصاحبي تثبيت= ترى قدمك هبيه لو تحول مالها قاعه

مصيبة تحسبون حسابكم غلط بلا توقيت=فعائل ما يسويها رضيع يشيل رضاعه
يقولون الملك ناوي يشتت شملكم تشتيت=عسى ربي يعزه هو متى بيحط مرقاعه

ترانا لو عطيناك الشحم لتقول ماوفيت= لكن الكم حساب(ن) عند رب البيت والساعه
ملكنا الله يعزه حي قلبه لاتقلي ميت= الا يااللي مثيرين الشغب جاكم بمدفاعه

ترى المكشوف ما يندس لو غطيت ما غطيت=ومن لا توقع طاح في عمقان وسباعه
ليا كان الغلط من يمكم وش عاد لي خليت=ياطير(ن)عارفين البدو مطياره وميقاعه

تعال وزورنا في مركز الغالين لوحبيت= وحتى تعرف المكشوف والرجال وطباعه
انا با ابنشدك يوم تقول هذا الهرج وش شميت= لو انك في مكاني كان جبت الذيب بكراعه

تحسبنك تعز الجدر وأنته يافتى هديت=بعد وصلت يا ذيب الخبت حلق الرجل و وراعه
ترى منته رقيب الله على خلقه ولو أهقيت=لا تحمل وزر خلق الله يبو عينين دماعه

انا اشوفك من الليله على موجاتنا فريت= ترى باعتك هزلانه لاتجلب يمنا الباعه
انا ماشي على السنه ولا في مذهبي سنيت= ولا حنا على بعض العلوم العوج تباعه

ترى هذي نصيحة كان تقبلها فنا لديت=وعلمتك بطب القلب يا رجال وأوجاعه
ترى صبرك يهد جبال والحكمة عمود البيت=ومن ربي منعها عنه عقله راح فرقاعه