أسعد الله أوقاتكم
بدون مقدمات اليكم الأبيات
للرجولة حق ياشبه الرجال=ماهي بنصبة وعرضٍ(ن)فيه طول
الرجولة ماهي بقيلٍ(ن)وقال=الرجولة قبل الأقوال الفعول
بالرجال زحول تشبه للجبال=وبالرجال همول في داخل همول
وبالرجال خبول تجفل من خيال=راعهم ظل الشجر تحسبه زول
نصبة الشيخان طال العمر طال=والدواخل فاضية مثل الطبول
الحكي واجد ويا قل الفعال=مثل ما قال المثل: نصبة فحول
الرجال أشكال شيبان وعيال=الكثر بالدون والقل الزحول
بعضهم يمناه في مطرح شمال=وبعضهم يسراه تطرح للجفول
بالرجال أشبه بصندوق وقفال=داخله ما ينعرف صعب الوصول
لو حسبته سهل بالواقع محال=تعرف بسده قبل كسر القفول
وبالرجال زحول تشبه للجمال=يحملون أثقل من ثقال الحمول
همهم ماهو بتنكيس العقال=عندهم تلقا ليا ضاقت حلول
باللسان وبالذراع وبالريال=يفتلون وينقضون أهل عقول
ردهم جاهز على قدر السؤال=رد محكم بالدلايل ومعقول
الوفا من طبعهم في كل حال=لو تلاقوا بالحدب فوق الخيول
معربين جدود وأعمام وخوال=يعدلون الميل لن جات الميول
يجزلون المد في ماقف ومال=ما تذروا باللوازم فالخبول
دون دين ودون عرض ودون حال=يبذلون ارواح ماراحوا فلول
عونهم ممدود من رب الجلال=نهجهم نهج الصحابة والرسول
بالنهاية كل مخلوق لزوال=غير رب الخلق دايم ما يزول
للرجولة حق ياشبه الرجال=ماهي بنصبة وعرضٍ(ن)فيه طول