طاب ليلكم ويومكم
اليكم الأبيات بدون مقدمات
تراودني مثل ما راودت يوسف عزيزة مصر=تقول الفاتنة يا هيت لك يا الفارس الشاعر
وأنا ماني بمثله بالحسن مابي وحتى عُشر=بشر مثل البشر ماني بلا نبي ولا ساحر
أخاف تقد لي طرف قميصي قُبل والا دُبر=وأخاف إن صار مني صد تسجني على الأخر
ما كنت أعرف بفعل السحر حتى ذقت طعم السحر=بدون أشعر وقعت بسحرها يا قدرة القادر
مصيبة كيف أسوي دبروني ياحماة الفكر=أنا ما ودي أصد المليحة وأكسر الخاطر
ولا ودي أسلمها هواها مير دوم تصر=وأنا قلبي ضعيف ولا أتحمل كيد ذا الماكر
ليا سلمتها أمري أخاف أموت ناقص عمر=ولن قمت أتحداها بكون لزينها ناكر
هنوف بحسنها تفتن لها إنقادت بيوت الشعر=تعانق للمحاسن في قوامٍ(ن)يبهر الناظر
لها طاعت قوافينا وزانت في معان النثر=تزاحم تطلب رضاها من المغرب ليا الباكر
تسامر طيفها والأمر يبقى عند راع الأمر=تمنى من عزيزة شعري المفتون لو تأمر
لها يخضع جناح العز وتذلل شموخ الكبر=وصوفٍ(ن)بالهنوف اللي لها أحلامي تسافر
بنيت لها بقلبي قصر وأحلامي ورود القصر=وعطرت القصيد بعطرها وأشواقي تخامر
نسجت لها مشاعر روحي الولها براد وحر=غديت لها دفا في بردها وأنفاسي الساعر
تشب النار في جوفي ضلوعي من لظاها جمر=وأعانق طيفها من لهفتي يا ولفي النادر
تزيد الشوق شوق وعزة المولى لزيد الصبر=على كثر غرابيلك لجيك بقلبي الطاهر
على شأنك ومن أجلك فداك اللي بقا من دهر=وتفداك المراجل كلها وأكون لك شاكر
ليا منه طرا لك حاجةٍ(ن)في جهر والا سر=تدلل وأطلب اللي تطلبه واللي تبي حاضر
جميع اللي تمنى يرخص لعينك بليا عذر=أنا ما عندي أغلى من فؤادي جاك يا شاطر
ملكته بالوفا والذوق ياسيد النقا والطهر=وأنا باقي مثل ما كنت خلك بالزمن فاكر
أسيرك والهنا كله لقيته في قيود الأسر=هنا عمري لقيته في قيود الفاتن الآســر
تراودني مثل ما راودت يوسف عزيزة مصر=تقول الفاتنة يا هيت لك يا الفارس الشاعر