بالهون يا بنت الأجاويد بالهون=لا تشعلين بداخل القلب ثوره
يكفيني اللي صار والله بالعون=لا تلحقين النار حر و حـروره
قلبي من البيض الخراعيب مفتون=دارت عليه من الزمن الف دوره
منها مضى تسعٍ(ن)وتسعة وتسعون=لكن وقع ذا الليل في شبك نوره
هزت عروق القلب وأمسيت مرهون=ما عادت أوجاعي عليها صبوره
أريدها شمعة تضوي لي الكون=ست الحسن بالزين دوم مغروره
تربعت بالفكر والقلب مسجون=والنفس في حب الجمال معذوره
أنا غرامي بالجميلات مزيون=بالذات من ربعه نواحي شروره
ناس الجنوب مكيفت كل متقون=أهل الكرم بالطيب قوم مخبوره
يا بنت أنا لأجلك تغنيت بلحون=الحان شعري بالغرام معموره
سويت بي سواة موسى وفرعون=سحرٍ(ن)قوي عل الذنوب مغفوره
سحرتني والخلق ماهم بيدرون=إني ضحية من فعول محظوره
ملكت بيت الروح والشعر والنون=يا لاعبٍ(ن)بالقلب لعاب كوره
قدمتها للوصل والحب عربون=للي وصوفه تتصف بالندوره
يا صاحبي الناس داين ومديون=ونفسي على دوم المواصل شكوره
وإن كان ما ودك فما كان ويكون=روحي ترى بتروح منك مغدوره
سو ما بدالك يا أريش العين ممنون=كلي فداك بدون راي ومشوره
الحسن يا ست الحسن رمح مسنون=نفسٍ(ن)يصوبها وكاد معثوره
لكن عليً بالهون يابنت بالهون=لا تشعلين بداخل القلب ثوره