أسعدكم الله
الأبيات بدون مقدمات
غردي يا مشاعر بغصن القصيد=حركي غصن شعري بنسمة هواك
ذكريني قديم وقدمي لي جديد=دام فكري يحلق بعالي سماك
إنسجي لي من الألحان لحنٍ(ن)فريد=يبهج الخاطر اللي محتمى في ذراك
كل ما حن وإلا ون جر النشيد=لين يرتاح قلبٍ(ن)في زمانه شراك
ليلة القاف يطرب يمسي الليل عيد=لا تغنا بترفٍ(ن)فيه وصف الملاك
حب خلي تمكن بالحشا والوريد=قاصرٍ(ن)دون وصفه ياقصيدي مداك
المشاعر بروحي لا ذكرته تزيد=تدفع النفس صوبه ما تهاب الهلاك
ليت ليل السهر مع طيف خلي يفيد=كان يا جرح قلبي للشعر ما شكاك
مير ياليت بنكٍ(ن)ما بقا به رصيد=يا عشير عيوني لي زمن ما تراك
كل حلمٍ(ن)حلمته مات لأجلك شهيد=أتعس الله مسايه وأسعد الله مساك
الليالي على قلبي قساها شديد=والمشاعر بقلبي ما تمنى سواك
يا وليفٍ(ن)على شأنه طويت البعيد=يا عسى كل غالي وحالي فداك
أتمنى تعيش العمر كله سعيد=معك قلبي وروحي والمشاعر معاك
غردي يا مشاعر بغصن القصيد=حركي غصن شعري بنسمة هواك