طابت أوقاتكم
الأبيات
....
الليل طال وضايق الصدر مازال=ماعاد باقي بالحنايا رحابه
يا ساكنٍ(ن)بالروح وشغير الحال=قطعت وصلك واتصال وكتابه
لك مدةٍ(ن)ما عاد دزيت مرسال=مدري جفا وإلا عليكم رقابه
وإلا نسيت ولا خطرت لك في بال=وإلا ملل صايبك ضيق الرتابه
تعبت أدور لك بمقفا ومقبال=مدري وله وإلا عثا بي صـبابه
لكن على ماقيل في كل الأحوال=مشتاق لك والشوق مابه غرابه
وأدري وتدري بالخفايا ولا تسال=يا موجعٍ(ن)قلبي بليا حرابه
طال الغياب وفرح الاعمار ماطال=وقتي نهشني مثل نهش الذيابه
اشكي همومي للقصايد والامثال=والعين تمطر مثل وبل السحابه
عليك ياللي غبت من عدة ليال=صدري ونينه مثل عزف الربابه
عود ترى حالي تدهور ولا نال=ما يرتجيه وصار قلبي خرابه
غديت بعدك مثل ميٍ(ن)بغربال=ضايع غريبٍ(ن)لو حولي قرابه
ما كني اللي بالمواقيف رجال=الليلة أهون من جناح الذبابه
تلعب بي الأوهام والهم غربال=اللي يصيبه يذبحه بالكآبه
الليل طال وضايق الصدر مازال=ماعاد باقي بالحنايا رحابه