جتني تصبحني مع الصبح بالخير=بالبسمة اللي مثل نور الصباحي
يامرحبا ياريحة الورد ما غير=شذاه مع جيتك بالجو فـاحي
اهلا هلا بك يا مكيد الغنادير=ياللي كما بارق مع الليل لاحي
اعطي على جيتك حلو التباشير=في حروتك من تالي الليل صاحي
فرحت في جيتك حتى العصافير=اسمع حبيبي صوتها كيف ضاحي
وانا عليك من العصافير بغير=واغار من هب الهوا والرياحي
اغار من كحل ن بسود المحاجير=واغار حتى من كلام ن مباحي
قالت: فديتك يازعيم المناعير=ياللي بقربه فرحتي وارتياحي
جئيتك وأنا قلبي مثل خافق الطير=يصفق بصدري مثل صفق الجناحي
قلبٍ(ن)تولع فيك شل التفاكير=مشتاق لك له مدةٍ(ن)ما استراحي
قلت اقلطي يا ام النهود المزابير=على فؤادٍ(ن)في محبتك طاحي
خذي مطاليبك من كبير لصغير=وإن جاء قصورٍ(ن)طالبك بالسماحي
القصد لا تشكين بالحب تقصير=ترى قصور الحب سمٍ(ن)ذحاحي
اللي تبينه ياهوى البال بيصير=ياجنة الدنيا وبلسم جراحي
بعد الصباح أنطرك في حزة عصير=الوقت كله للغلا مستباحي
أنا و وقتي والشعر والتعابير=فدوة عيونك جد ما هو مزاحي
اللي تبين يجيك من دون تأخير=يا نادرة بالحسن بين الملاحي
الله يمسيك فالليل بالخير=بالبسمة اللي مثل نور الصباحي