طابت أوقاتكم
عزاه يا قلبٍ(ن)غزتك المخاطر=عقب غياب اللي لكله هويناه
ماض الزمن ماهو كما وقت حاضر=مدري وش اللي مبعد الزين وأشقاه
اللي من أول بين الأجناس نادر=من كل زين وزين جايه من أقصـاه
كانت تسابقني بوصف المشاعر=واليوم نسيت كل معنى شرحناه
نسيت معاني في قصايد لشاعر=وإن قلت:ليش تقول وقت ونسيناه
ما تدري إني كل ليلة بسامر=طيفٍ(ن)مسوي في خفوقي معاناه
طيفٍ(ن)يزف الشوق مثل المجامر=كل ليلةٍ(ن)في كل هاجوس بلقاه
يطعن خفوقي مثل طعن الخناجر=لهفة وشوق وحب للي عشقناه
أقضي ثلاث أرباع باللي ساهر=من شان عين اللي حضوره فقدناه
اللي خذاه الحظ وأقفا مغادر=غصبٍ(ن)علينا ما بغينا لفرقاه
غادر ودمعي حابسه بالمحاجر=ماني مصدق روحته لا عدمناه
حبيب روحي ساكن بقلب جابر=كل ما ذكرته قلت يا قلب عزاه
لكن زماني مثل ماقيل غادر=بعًد وليفٍ(ن)كل يوم أتمناه
أخذه وأنا لا زلت للزين ناطر=أطمع بوصله والليالي تحداه
لا هو بيقدر مثل ماني بقادر=ما باقي إلا وجد روحي وذكراه
كل ما مضى بالعمر لا زلت فاكر=لا زلت فاكر كل ماهو حكيناه
منقوش فيني مثل خط بدفاتر=معناه واحد كل ما احنا قريناه
شاهد علينا ما يغيره ناكر=يشهد لنا باللي بذا العمر شفناه
رفيقنا حتى بوسط المقابر=سجل مثبت كل ماهو فعلناه
ياللي حداك الوقت لو جبر خاطر=لا تقطع لحبلٍ(ن)بحبك وصلناه
ترى الهوى يا مشغل الروح كافر=وإن كان عفتوا منه حنا شريناه
دام العروق تضخ دم الحناجر=عفت الحكي كله وجودت بالآه
الوقت مهما كان كايد وجاير=منهو نوده لو ترك ما تركناه
بنشد بقانون الخبر والتخابر=واللي بقي من عمر بالعون يفداه
بقضي لباق العمر محروم صابر=وليا شعرت بضيق ناجيت يالله
إرحم لعبدك وأنت للحال ساتر=واللي كتبته بالصحايف لقيناه
يارب ترحمني لك الله شاكر=ماهو رضيته يا الهي رضيناه
الحظ ما يعرف لجبر الخواطر=وحنا عجزنا بكسرها ما جبرناه
اللي من أول كنها وبل ماطر=أقفت مثل مقفي سحابٍ(ن)حبس ماه
ياما سهرنا بالليالي نذاكر=نكتب ونشرح درسنا ما فهمناه
عزاه يا قلبٍ(ن)غزتك المخاطر=عقب غياب اللي لكله هويناه