أسعد الله أيامكم ولياليكم
الأبيات بدون مقدمات
عسى الضحكة اللي هزت القلب يالمزيون=وهزت لطاروق الهوى ثم غنيته
فداها من البيض الخراعيب كم مليون=وباق النساء يفدن مضنون حبيته
عشيرٍ(ن)عشقته والهوى والغرام جنون=سقا الله زمانٍ(ن)جاب لي من تمنيته
سكن بالحنايا والعرب عنه ما يدرون=كياني وطنه وخافقي عرشه وبيته
تربع على عرش الهوى والغلا ممنون=برمش العيون عن المخالق غطيته
رقص خافقي من فرحته دق نبض لحون=وأنا دون باق الخلق بالصدر ضميته
ليا من تكلم لفني بالمكان سكون=وترتاح روحي لن تبسم وحاكيته
فتني بطيب الروح والمنطق المتقون=غرامٍ(ن)تمنيته وذا لحين لاقيته
عذوبة بصوت وحسن تسحر وأنا مفتون=كلامٍ(ن)يقوله كن ما قبله أوحيته
ليا من سمعته قلت:يابعد من بالكون=فداياك روحي ثم من قبلك أغليته
سحرني بزينه والهوى والجنون فنون=ملك خافقي والفكر للحب سجيته
على شأن غاليتي جميع الصعاب تهون=وكل غاليٍ(ن)لأجل الغلا ما تغاليته