الحال ياكل الغلا صار منهار=ما كني الاسهم سوق السعودي
حظي معاكس باتجاهه للأسعار=في نقص دائم ما يعرف الصعودي
قريب بعلن بالوكالات الإشهار=البنك فلس ما بقا به نقودي
ماعاد باقي فيه لو كان دولار=الا ديون مراكمة بالقيودي
وضعي غريب وفيه الألباب تحتار=عم الكساد وصار فيني ركودي
كل الذي أرجيه من دنيتي طار=ماعاد ظني يوم يمي يعودي
حتى الفكر تبخرت منه الأفكار=غديت أشك بصحتي في وجودي
كل الجهات الأربعة صارت يسار=ماني بعارف وينه أخر حدودي
كل المكاسب صارت اليوم مخسار=طوتني الأيام وأخذت جهودي
تهدمت من بعد ما كانت إعمار=وأكبر خسارة صار فيني برودي
ماني بقادر أبني بيوت وأشعار=صارت بعيني كل الألوان سودي
حتى السما شحت علينا بالأمطار=والأرض صارت من جدبها جرودي
ما كنها الا ولعت جوفها النار=من سهلها لا شامخات الحيودي
ودي أبدل جافي الدار بديار=ماني بجايب مكسب(ن)من قعودي
لكن مدري وينها دار الأخيار=ودي بدار ما نزلها حسودي
خلاص أنا قررت بشد الأسفار=بكسر حواجز صمتنا والجمودي
هذا قراري كان ودك بالأخبار=بريحك ماعاد بتشوف رودي
مليت من كثر التحايل والأعذار=مضى عليها من حياتي عقودي
كنا صغار وحلمنا نصبح كبار=ماشي كبر الا كبار اللهودي
من يوم حنا صغار واليومه صغار=الحال يرجع للورا ما يقودي
صرنا بضاعة سوق بيدين تجار=من يوم ضيعنا شموخ الجدودي
الشيخ صار بعينهم بس سمسار=ماعاد به قيمة ولا فيه فودي
الحال ياكل الغلا صار منهار=ما كني الاسهم سوق السعودي