أسعدكم الله أين ما كنتم
أبيات أخر الليل علها تروق لكم
والمعذرة لو فيها قصور
تراني على ما يقولون من النار على السفرة
ما أحب العيشة الباردة او البايتة
ماتت الأحلام في حضن الهجر=وانكسر قلب المولع وا عناه
ما بقا لي من هواي إلا القهر=بعد كل الحلو مضنوني نساه
أتقلب كن يصلاني جمر=والغضي مرتاح داله في هواه
كيف ينساني بعد هذا العمر=أوهبه حبي ويجزاني جفاه
وإن سألته ليه لفق لي عذر=يرمي أعذاره ويعطيني قفاه
لين شب النار في فكر وصدر=وانكسرت وصحت به ياخل لاه
ما بقا عندي على بُعدك صبر=الهوى والشوق بالغ بي مداه
المحاجر ناشفات من السهر=والمشاعر تحرق القلب وحشاه
كن بالخفاق لاهب من سقر=أحرق الأنفاس من واهج سناه
والتعب باين على فكر ونظر=والشجن بالروح واصل منتهاه
والحسايف كنها خنجر نحر=سدحت أحلام عمري للذكاه
ياحلوم الليل جوزي بالسمر=قلبي الموجوع جاله ما كفاه
حالى أحلامي يصير الصبح مر=لا صحيت وشوف عيني ما لقاه
حظي اللي جاعلك يا مُر أمر=الوجع معروف والعلة دواه
الدوا بالوصل والهجران شر=ياغرامي كان تبغالي حياه
مد كفك لا تفكر بالبشر=البشر محدٍ(ن)هجر مثلك غلاه
لا تموت أحلامك بحضن الهجر=ينكسر قلبك وتشكي من عناه