صباحكم شعر
الأبيات
ياللي لكم بالقلب قدر وحشيمه=مقداركم يجلب عليه المسره
اغليتكم حيث النوايا سليمه=لله در الود لله دره
محبةٍ(ن)بالقلب فيني قديمه=تكبر مع الأيام والعمر مره
مضى كثيره والأماني مقيمه=ما نلت منها لو مقدار ذره
ودي و ودي والليالي وخيمه=ودتك عني ما كسبت المبره
ما باقي إلا روح عاشق مهيمه=تحيا على حبٍ(ن)فؤادي مقره
أبيع وأشري والخساير عظيمه=الوقت من يأمن لخيره وشره؟
تكسرت أحلام عزم وعزيمه=اليأس خيم فوق بحري وبره
ما باقي إلا ذكرياتٍ(ن)كليمه=خلف الضلوع العوج ماهي ببره
أذكر زمانٍ(ن)فات من شوق ريمه=أيام كان الشوق تشكي لحره
واليوم صار الجو مكسي عسيمه=ما عاد نعرف صحوته من غبره
خيب لظن منادمٍ(ن)في نديمه=يبي فلاح وخائفٍ(ن)من معره
ياللي لكم بالروح باقي وسيمه=من حقي إني لن زعلت أتشره
الجود طبعٍ(ن)لليدين الكريمه=والشح طبعٍ(ن)للنفوس المكره
كل سلعةٍ بالسوق تعرض بقيمه=ومن ساير الجاهل مع الوقت غره
وختامها ماني براعي ظليمه=كلام شاعر هاجس الشعر جره
الصمت بعض احيان فيه الغنيمه=والحكي بعض احيان فيه المضره
ياللي لكم بالقلب قدر وحشيمه=مقداركم يجلب عليه المسره