والله اني لا ذكرت اهل الفضايل والجميل=والرجال اللي لوقفات الصفوف مجملة
سال دمع العين مثل السيل يوم انه يسيل= من علو الشعب من غزره يحول لاسفله
كنت احسب الحزن في فرقا خليل(ن)عن خليل=او صغير عقب زانت ضحكته فارق هله
لين عشت التجربة واقع ولا تبغا دليل=والمثل قال المجرب ماندم من يسأله
اثر توديع النشاما جرح طبه مستحيل=ومستحيل النفس مهما كابرت تتحمله
الرجال اللي لهم بالوافية باع(ن)طويل=فعلهم وقت الشدايد ماخلق من يجهله
فرقة(ن)تسوى لواء كامل وخمس امية فصيل=بالشجاعة والولاء والمعرفة والمرجلة
يوم بانت حاجتي صفوا كما الضلع المهيل=كل واحد منوته يشتال حملي بأكمله
قلت همي زاد قالوا لا تحط ولا تشيل=خل همك عندنا واطرف مشبب ينقله
وابك حنا فوق راسك ياولد ظل(ن)ظليل=ماتنوشك شمس لو نحرق سرية كاملة
والكثير اللي تشوفه عندنا شي قليل=والصعيب اللي تقوله في يدينا ماسهله
قلت يانعم الرجال اللي توفي كل كيل=ياسعد منهو نخاكم لا جرى له مشكلة
المعونة مانبيها من يدينك يالبخيل=نحمد الله في غنى واللي نقوله نفعله
دام في جنبي رجال(ن)تنقل الحمل=نقض الحبل الموثق باليدين ونفتله
والله اني عن رجال الطيب مادور بديل=مار حدتني ظروفي والحقوق مسجلة
الجميلة ماتضيع عند رجال(ن)اصيل=والبشر كل(ن)يجازى حسب قوله وعمله
اعذروني يالنشاما واسمحولي بالرحيل=والمعزة دايمة واللي نبيه مواصله