أسعدكم الله
الأسبوع الماضي ذهبت بجولة على الساحل الغربي
معزوم بمناسبة وقضيناها على ما يقولون حج وجاجة
ودونت على جوالي بعض القصائد سوف أنزلها تباعا بمشئية الله
كان معي خويا واحد منهم يوم صرت اسمعهم بعض الأبيات
يقول والله لن دروا عنك العربان ما عاد يعزمونك
المهم اليكم الأبيات
الليلة الطاروق مرساه بملج(1)=بالساحل الغربي لشبه الجزيره
يالنصف الأخر من شهر مجمع الحج=ليلة خميسٍ(ن)بالبدر مستنيره
يصفي بها الهاجوس لو كان مرتج=أشياء تروق للمشاعر كثيره
الأوله الجو صافي من العج=والثانية بالأمن نادر نظيره
والثالثة مافيه في جوها ضج=يا حلو ساحلها وناسٍ(ن)وديره
والسابعة لقيت فيها من الغنج=غزلان لكن بالحذر مستذيره
صيدٍ(ن)ليا حس بخطر للزبن هج=العين ما تلحق تصور نفيره
أسرع من المرسال لن لامس البرج=مستقبلاته للفضا مستديره
من بينها شاهدت رعبوب منزج=محاسنه للعين والله مثيره
اللون صافي كنها قطعة الثلج=وشفاه تشعل كنها من جميره
هيفاء تشاد البدر وعيونها دعج=تذبح بنظرات العيون الخطيره
من شفتها ضيعت للعقل والهرج=حسيت في صدري سواة السعيره
مشاعري في داخلي صابها مرج=ممزوجةٍ(ن)ما بين رغبة وغيره
فلوة بعد ما شد في ظهرها سرج=مصيونةٍ(ن)من خيل شيخ العشيره
أثمن من البونج وأغلى من الرنج=تسوى لحكم منظمين المسيره
شوقي لها في داخلي بالمنى لج=غنيت طاروق اللحون الشهيره
الليلة الطاروق مرساه بملج=بالساحل الغربي لشبه الجزيره
1- بملج : مدينة املج على البحر الأحمر