بعد بان قرص الشمس في ساعة الإشراق=وطارت من أغصان الشجاري عصافيره
تطاير حمام الدوح يطلب من الخلاق=يوفقه في رزقٍ(ن)تنوشه مناقيره
الا يا حمامة سارحة تطلب الأرزاق=من اللي خلقها ما تعول على غيره
وحنا البشر ما نطلب الواحد الرزاق=نحسب الجهود اتجود من غير تدبيره
على الله رزق الخلق من جوده الدفاق=جميع الخلايق تحت حكمه وتقديره
رزق للسمك في داخل البحر بالأعماق=ورزق طير عانق للفضاء في مطاييره
عليه إتكالي كاسي الغصن بالأوراق=يحقق مرادي رازق الخلق من خيره
يقرب بعيدٍ(ن)حال دونه زمن وآفاق=بعد حار بصري بالزمان ومخابيره
رجيت الزمن وأثر الزمن للعمر سراق=أخذ حلو عمري والعقل ضاع تفكيره
ألا يا رجايه صدر مغليك رحبه ضاق=وش اللي بقى لي بعد حظي غدى طيره
ما باقي يكود أحلام ما تنتهي وأشواق=وحالٍ(ن)ردي ما عاد تقنع معاذيره
تصبرت وأثر الصبر للمبتلا حراق=لكن البخت لن شأن تكثر محاذيره
سنينٍ(ن)طويلة شاعرك بالحلم ما فاق=ولن فاق يقطع من جنونه لأزاريره
ليا غاب قرص الشمس والليل طال وعاق=تبات المشاعر في قهر صعب تفسيره
تحرى لقرص الشمس في ساعة الإشراق=تطيًر من أغصان الشجاري عصافيره