أسعدكم الله
النجاح سمة الأذكياء
و
الفشل سمة الأغبياء
وما بينهما جمهور الغوغاء
وهذه الأبيات من سمة ذاتي
وشكرا لمن نبهني للأخطاء
علها تروق لكم
بعض البشر فكره كما الشوف محدود=ابعد مسافة شافها راس خشمه
ينقد وهو في كل الأحوال منقود=وشلون يقبل راجح الراي حكمه
عليه رايه بالبراهين مردود=كلام قاله ما تجاوز لفمه
النقد بابه للجهاهيل مسدود=النقد ما يتقنه من قل علمه
المعرفة والعلم يا طالب الزود=الوان كلٍ(ن)ينتقي حسب فهمه
ومن لا كسب للبيض يكسب من السود=ولا كل من يحلم يحقق لحلمه
وجدرٍ(ن)بلا سيسان مهدود مهدود=ومن لا طلع لأبوه ترتده أمه
والخير في بيتٍ(ن)من الضيف مريود=ومن لا نفع لأبوه ما ثاب عمه
ومن لا حمد للغير ماهو بمحمود=ولا ترتجي فزعات شاكي لهمه
ويا تعس من حده زمانه لمقرود=مافيه رايٍ(ن)يتركه في متمه
وليا نصحك العود لا تعصي العود=تجاربه بالوقت في فيً كمه
حاسب على ممشاك في درب مقعود=منهو تبع غضبه بيضيع حلمه
فكر بكيف تحل عقدة بمعقود=لا تندفع من دون بصر وتخمه
أخر نصيحة الجسد زاد للدود=والمال للوارث وغيره يلمه
بعض البشر فكره كما الشوف محدود=ابعد مسافة شافها راس خشمه