طابت أوقاتكم

الـبـارحة لـيـلي حـكـاية اسـاطير
مـا ظـن يـاتي مـثلها فـي حياتي
غـزتني افـراس الـقصائد مغاوير
الـلـيل كـلـه بـيـن هـاكـي وهـاتي
اطرد لهاجوسي مثل طارد الطير
مـا ذقـت طـعم النوم ليلة مباتي
كله من اللي تل قلبي عسى خير
صـحاه واشـعل بالحشا ذكرياتي
قـال الـقصائد ويـنها قـلت ماغير
قــدايـم ٍ(ن)كـتـبـتها قـبـل تـأتـي
قـدام أعـرفك يـا زعـيم الـغنادير
كـان القصيد يسدني عن سكاتي
قـال اسمع اسمع ماتفيد المعاذير
هــات الـقـصائد هـاتـها يـاغـناتي
مـايصير تكسر نشوة الود تكسير
تــرى غـلاتـك غـايـتي وأمـنياتي
قـلت الله اكبر يالحلوم المسايير
لــويـش نـغـصتي عـلـيَّه سـبـاتي
لـويش حـطمتي قـيود ومحاذير
وشـلون أجـمع من سنيني رفاتي
مـا يـنفع الموجوع كلمة وتصبير
الـلي رحـل مـن عمر ما عاد ياتي
يـوم الـسنين الـمقبلات الـمناوير
ماشفت لك فزعة بلحظة شكاتي
والـمعذرة لـوجاك يـاحلم تـقصير
اللي مضى ياحلم ولى وفاتِ(ي)
سـر السنين انذب في قاعة البير
لا عـاد تـبعث سـرنا بعد ماتِ(ي)
الـبـارحة لـيـلي حـكـاية اسـاطير
مـا ظـن يـاتي مـثلها فـي حياتي

ⒿⒶⒷⒺⓇ