بسم الله الواحد الرحمن ماله حدود=قادر على كل شيء ومعتلي بالمقام
أنعم علينا بخير ودوم فضله يزود=يعلم بما نفعله في صحو وإلا منـام
يعلم بسر القلوب ومطلع للسدود=في كل حال ومجالٍ(ن)مأخذٍ(ن)بالزمام
من عقبها دندن الهاجس سواة الرعود=وأسرجت له صهوة الفكرة ولزم الخطام
يا هاجسي سوقها ما فيه منع وقيود=ارقى على قولهم بالشعر ذروة سنام
العرف فيني وراثة وارثه من جدود=أنا محنك على الإبداع قبل الفطام
واليوم يا هاجسي حان الوفا بالعهود=أكتب على صفحة التاريخ جزل الكلام
ماني بمن يخلف لعهده بزيف الوعود=كل طبع فيني على ما قيل وافي تمام
سوق القصايد سنود وعلها بالسنود=ما يخفي الراس من ذلة يكود النعام
خل القصايد وسيمة فوق بعض الخدود=فهم لغيري بقصدي والهمام الهمام
ماني بميت قبل يومي ولو صرت عود=العمر والرزق بيدين اللي يسوق الغمام
الرأس ما ينحني إلا بوقت السجود=للواحد اللي رزقني من شراب وطعام
ماني على غير ربي بالزمان محدود=خوفه وتقواه واضعها لصدري وسام
يامهتوين العتاب وعاشقين الصدود=مالي عليكم حقوق ولا عليكم ملام
لن صار من طبعكم نكران ود وجحود=سلام ياناس والدنيا عليها السلام
أخر نهاياتنا للي خلقنا نعود=بنموت ويموت فينا كل كره وغرام
ما باقي إلا الكريم اللي خلق للوجود=سبحانه الواحد الرحمن رب الأنام
الحمد للواحد الرحمن ماله حدود=قادر على كل شيء ومعتلي بالمقام