أسعد الله أوقاتكم بكل خير
الأبيات بدون مقدمات
النص المكتوب
تزاحمت خلف الضلوع المشاعر=ما بين ليت وليت هم ومسره
بين الرجا واليأس وأفر ونادر=مكسور حظي وين بلقى لجبره
مواجعي مثل الخلايا تكاثر=وأفراح عمري حفنةٍ(ن)جوف صره
ودي و ودي مير ياحظ جابر=ما كل ما راده تحقق بعمره
الحلم يكبر والبلا حظ عاثر=كل ما حلمت بحلم بادر بضره
حلو الأماني عودةٍ(ن)بالمباخر=حظي حرقها بعد ما صار جمره
إلى متى بكون صامد وصابر=العمر يمضي والحشا قل صبره
ما عدت مثل أول قويٍ(ن)مكابر=لله در الوقت لله دره
غير كثير بمظهري والمخابر=حتى شريط الفكر بالفكر فره
نساني أشياء كنت من قبل فاكر=وذكرني أشياء شفتها بس مره
ما بين كان وصار ماضي وحاضر=لا زلت كني ما تكسبت خبره
مشاعري ما عاد تشرح لخاطر=لكن مالي بالمقادير دبره
سطرتها بلحون شعرٍ(ن)لشاعر=عل وعسى يلقى بها الناس عبره
ومن لا يشوف الدرب ساعة يناظر=ما هو بقادر ينظم لخيط بإبره
وختامها طلبت معبود قادر=يغفر لعبده حين يدخل بقبره
لا من تخلى عنه مادح وشاكر=وأصبح رهين لما عمل جوف حفره
ما له ونيسٍ(ن)في ظلام المقابر=إلااك يا من كل ذنبٍ(ن)تغفره
تزاحمت خلف الضلوع المشاعر=ما بين ليت وليت هم ومسره