السلام عليكم جميع
يابوطلال ان كان نـاوي لمكـه=اكيد لك درب(ن)علـى الطايـف
رح للذي قلبي عن الغير صكـه=قله يفكه يابيض الوجـه خايـف
قله ترى حبله على القلـب تكـه=يابو طلال الموت بالعين شايـف
تكفى فديتـك ياعضيـدي يفكـه=قله ترى روحي عليهـا كلايـف
مثل الشعيب الي من السيل دكـه=خلى الشجر والقشع وسطه لفايف
قله شربت الكاس والموت حكـه=كاس الهوى بالقلب والراس طايف
عزالله ان الزيـن قلبـي يركـه=وانا علـى لقيـاه كلـي مهايـف