أسعد الله أوقاتكم
بدون مقدمات اليكم الأبيات
يا مشغل القلب وينك طول غيابك=لاتذبح الحب بالهجران والصده
الله يرحم لحييٍ(ن)يالغلا جابك=ما عاد باقي بقلبي للصبر شده
القلب تنزف جروحه كله أسبابك=والنفس فوق الوجع ياهيه منحده
ذبحتني بالصدود وبردة أعصابك=هجمات هجرك عليه جات مرتده
ما كني اللي قبل عنوان لكتابك=طويت صفحة لهيب الشوق من مده
تركتني في هجير الشمس في بابك=أمد كف العطش يا خي وترده
راجي وصالك وطالب جمرة عتابك=أرحم من أبواب وصلٍ دوم منسده
ياليتني جار لك وإلا من أقرابك=وياليت بحر الخبر يقرب على جده
ياليتني كحلةٍ(ن)تزهي على أهدابك=وإلا نقوشٍ(ن)على الكفين مسوده
وياليتني عطرك الغالي من أطيابك=أنرش فوق الترايب والفت اللده
ويالتني بيتك المبني على أطنابك=أطناب حبك عروق بقلب ممتده
أجملك وأعجبك وأقهر بك أصحابك=أكون سترك بصيف الشوق والبرده
يا مشغل القلب وينك طول غيابك=لاتذبح الحب بالهجران والصده