يا بنت لو إنك سواتي تحبين=ما كان حنا بالليالي خسرنا
ويا بنت لو إنك سواتي تعرفين=إن العذارى حبهنه قدرنا
يا ما تعذبنا على شأن يرضين=ويا ما كتمنا بالضلوع وصبرنا
ويا ما قطفنا من ورود ورياحين =ويا ما طلبنا ودهن وسترنا
ويا ما تمشينا بحلو البساتين=ويا ما نظمنا من قصيد ونشرنا
كله على شأن البنات المزايين=اللي ليا شفناهن نرمي غترنا
بأسبابهن يا بنت أول وهالحين=يا ما تذابحنا ويا ما انتحرنا
لكن ما تدرين وشلون تدرين=ما دام ما جيتي نواحي ديرنا
حنا ترانا بالمودة سلاطين=اللي نوده مسكنه في نظرنا
نفداه بالأرواح بالعسر واللين=أرواحنا من دونهم ما ذخرنا
لكن معذورة لأجل ما تظنين=إن المعزة سرها في خطرنا
من دون من نهواه نغدي شياطين=ياما حرقنا من كبود وفطرنا
ما همنا لو كان نخسر ملايين=أهم شيء ليا عليه إنتصرنا
ترى هوانا ما يباله براهين=مشهود له بغيابنا وإن حضرنا
بس المهم إنك على الود تنوين=بعدين بشرح لك بقايا سيرنا