أسعد الله أوقاتكم بالخيرات
الأبيات بدون مقدمات
الناس تزعل من خسارة دراهم=وأنا خسرت اللي عسى الكل يفداه
راح العمر صابر وناطر حراهم=أرقب رجوع اللي خفوقي تمناه
أحلام روحي راكضاتٍ(ن)وراهم=ما نلت منها غير ويلاه ويلاه
مدري متى يا حظ عيني تراهم=وأرتاح من هذا العنا والمعاناه
عسى الصبايا كلهن فداهم=ويفدى حبيبي غالي المال والجاه
ما عاد لي بالناس شفٍ(ن)سواهم=إن عاد والا بقضي العمر بحراه
أحباب قلبي محد يأخذ غلاهم=لو الزمان يجور ما والله أسلاه
دنياي ما تسوى بليا هواهم=والروح مني عشقت البعد والآااه
كرمان لعيونٍ(ن)فتني حلاهم=وكرمان للي صعب بلقا حلاياه
روحي وقلبي والشعر ما نساهم=في كل طاروقٍ(ن)من الشعر بلقاه
حتى قصيدي صار يعشق نداهم=يعشق اسم مضنون عيني ويهواه
لو هو قريب أجزم يقبل يداهم=أنا وشعري والهوى رهن ليداه
تنزف جروحي والدوا والمراهم=عند الذي عل الخراعيب تفداه