أسعد الله أوقاتكم بكل خير
الأبيات
إنطلق رمح الهوى عنوة وجاني=منك ياللي عينها عين النـداوي
رمش عينك يالغضي قاصد رماني=صاب قلبي بالهوى وأمسى غناوي
صابني يارجوتي بين المحاني=صار قلبي من بعد يأسه رجاوي
يا وليف الروح يا ملهم بياني=يا جميل الحلم يا كل المنـاوي
الدقايق معك تسوى عمر ثاني=والسنين بدون شوفك ما تساوي
آه من حبك ومن شوقٍ(ن)كواني=الهوى والشوق تذبح للهواوي
تال ليلي طيفك الساحر غزاني=ولع أشواقي وخلاني خلاوي
اتوجد وأجمع أشتات الأماني=وأجمع الذكرى وأسويها تداوي
صرت تال الليل في غفلة زماني=بين ليت وبين كان وكيف ناوي؟
أتقلب في فراشي من جناني=والهوى والشوق ذيبه بي عاوي
ما رويت ولا شبعت ولا كفاني=ما شربته منك يالنبع الرهاوي
كيف بروى منك يا نبع المعاني؟!=وكيف بشبع منك يالتمر الحساوي؟!
كل ذاتك لو شربتك ما رواني=العطش والشوق من فوق الهقاوي
نبض شوقي اشتكيته وإشتكاني=واستمر الليل في نقض ودعاوي
لين وقت الفجر بحساب الثواني=أضرب الأخماس بأسداس ويساوي
أتذكر للمحاسن لو عصاني=ليلي اللي ما يخلي للمساوي
أذكر اللي في زمانه ما نساني=وأذكر اللي سرني ماني بغاوي
سهم عينك ما نسيته حين جاني=منك ياللي عينها عين النداوي