قايد الفوج بنرقيه رتبة لوا=ثم نعفيه من منصبه حسب النظام
ون شكى من وجيعه عندنا له دوا=ون تعذر علاجه ياعسى للرحام

كلنا فالهواء يابن هليل سوا = بادع القاف لا تبدع بغير السلام
ذيب ياللي على المرقاب قام وعوا = تعرف اللي جنوبه صلب وقت الزحام

من ورد للعدود الصافيات إرتوى=وإن ورد غيل موبي راح عند الشمام
لا تسمع لمنهو بالأذاني دوى=والتحية تبا تقطع صلاة الإمام

ما تنفست غير الصافي من الهوا = وان تكلمت اجيب امثال خير الكلام
الضعيّف ضعيّف لو اشيله هوى = مار شوف الرعيه و انت راع الحسام

العرب بالجزيرة شافت المحتوى=المراسل يقول الخلق راحت عدام
من يذكي ذبيحة يحتزم للشوى=لا يوفر لحمها والشحم والعظام

المراسل رفيع الراس و المستوى = مار وسط الجزيرة ناس تهوى الظلام
يا وجودي على لزمة لعين الثوى = مير ما يحمل اللي يحتزم بالحزام

الصقر ياعميل الخير ما ينشوى=لو بعض العرب يحسبه فرخ الحمام
شفتكم لازمين البس وأسمع صوى=خنقة البس يامسلم تراها حرام

ابشر ان السقيم ابن السقيم انكوى = يا يزول المرض والا يزيد السقام
احسب انه سليم الدرب واثره غوى = مير ابنصحك عندك لا يقيم وينام

دابنا اللي علاكم بالجرين التوى=سم نابه يصحي للرقود النيام
أكل تمرتكم الحلوة ورمى النوى=ويش ودك تسوي فيه ياذا الغلام

دابكم من بعد مالفكم وانطوى = ما هقيته يعوّد للرجال الحشام
بسّةٍ جالها وسط الغداري مواء = لفت ذنيبها والناس تنظر حيام

بعد بين حصيله والثياب الطوى=قضها بالحراج البايره ما تسام
نجمة الصبح بانت والجنوبي غوى=والحمول الثقيله باقيه بالسنام

يا حسين السجايا لا تدور خوى = دف ولد الحرامي خلف وادي جهام
اربعميه وميّه وافردوها سوى = بيّنه ما تبا توضيح يابن الكرام