الأبيات
يالربع منهو يرقي=راع الشمال الشرقي
سرق لقلبي سرقي=الله يكون بعوني
ودي بقربه ودي=ليته قريب عندي
اهنا بمزح وجدي=والناس ما يدروني
فيه الحلا والرقه=وفيه الدلال وحقه
قلبي قطع لي عرقه=غديت له مفتوني
اقرأ جميع حروفه=عقلي غزته طيوفه
ليت العيون تشوفه=يكحل حلاه عيوني
ليلي بدونه ويلي=ما كن ليلي ليلي
صمته يهد لحيلي=زاد الطعون طعوني
الشعر ما سلاني=بكيته وبكاني
الدمع بحر أعياني=والموج فوق لحوني
ياصاحبي يانادر=الفكر موجه هادر
والوقت طبعه غادر=بعدك يزيد جنوني
اما تعال وعالج=جرحٍ(ن)بقلبي والج
من حبك اللي خالج=مشاعري وظنوني
وإلا تجمل وإرحل=ترتاح وأنا بزعل
كمل عذابي كمل=لا تلتفت لغبوني
مسموح لك مسموحي=زيد الجروح جروحي
يفداك قلب وروحي=واللي يكون يكوني
ماني بطالب راقي=لا من بغيت فراقي
جمر الهجر حراقي=من كل لون ولوني
ما ينطفي لو برقي=راع الشمال الشرقي
سرق لقلبي سرقي=الله يكون بغوني