أسعدكم الله جميعا أين ما كنتم
غالي من الغالين عاد هذا المساء لعمله بالخُبر بعد قضاء اجازته
فقلت هذه الأبيات
علها تروق لكم
أودعتك الله يا مسافر وناو الخُبر=تاصل بخير وسلام
يحفظك رب البشر ياأغلى جميع البشر=في حفظ رب الأنام
سلم على حي ساكن قُرب شط البحر=بلغه عني كلام
وصله عني خبر وأرسل عليّ بخبر=عسى ظروفه تمام
قل له ترانا بخير الله يديم الستر=ما فيه بأس وملام
الود ودي أجي وأعلمه واعتذر=قدام شهر الصيام
لكن حداني أمر والعبد حسب الأمر=من واحدٍ(ن)ما ينام
الله خلق للبشر وأجرى علينا القدر=كل شيء حسب النظام
العام كنه شهر يا سرع مشي الشهر=والعام ماهو بعام
أيام يا سرعها تطوي سنين العمر=يالله بحسن الختام
ترجع لنا بالسلامة ما يطول السفر=تاصل بخير وسلام
ترجع لنا بالسلامة من ربوع الخُبر=تاصل بخير وسلام