أسعدكم الله جميعا
وجدت قصيدة من الشاعر : الشيخ فارس
موجهة لي على الرابط التالي
http://www.alqwafel.com/vb/showthread.php?t=18609
فكان هذا ردي المتواضع على عجل والمعذرة من القصور
حي الجواب وحي ذربين الايمان=ما هي غريبة من مذاخر عتيبه
الله يحييكم محبة وصفطان=الأصل ثابت ما بها من غريبه
يالعزوة اللي مجدها طول الأزمان=الطفل منهم باللقا نعتزيبه
ظفران لا من قيل ياحي ظفران=من يومهم ما يعرفون الغليبه
ورعانهم وقت اللوازيم فرسان=ما يضيع للعتبان حق وسليبه
بالساعة اللي غيرهم صار ورعان=ربعي عتيبة اهل شيمة وهيبه
ذباحة الحايل ولو غليت أثمان=لطامة العايل بوقت الحريبه
الله وهبهم عز وشموخ وإيمان=رفع مكانتهم بنزال طيبه
أرفع شرف نالوه من فضل رحمن=والحمد لله والمذاخر رهيبه
عز الخوي والجار وإكرام ضيفان=أهل النقا ما يتبعون المعيبه
مثل الشوامخ ثابته فوق سيسان=ما تشتكي من برد وإلا شبيبه
بنيان ما ينهز لا عز بنيان=ذرى الدخبل وظل ناسٍ(ن)قريبه
ماهي مجرد حكي ولحون قيفان=الفعل ثابت والشواهد عجيبه
المدح في بعض المواقيف حقران=والذم في بعض المواقف مصيبه
ياما شعلنا للمواجيب نيران=وياما طفينا نار قوم لهيبه
واليوم بعد الوقت يا صاحبي زان=بعض العرب نسي يواصل صحيبه
الكل منهم صار لاهي وبطران=مشغول فكره بالجنب والجليبه
من غرته دنياه ماهو بكسبان=والعرف يبقى للعقول النجيبه
ما فادت الدنيا لجابر بدسمان=رحل وقصره بعد عزه خريبه
إلا أنا كسبان ماني بخسران=ربعي عتيبة للصعيبة طبيبه
يامرحبا بفلان وفلان وفلان=ما أخص واحد من كهول وشبيبه
ربع وبني عمٍ(ن)وخالٍ(ن)وعمان=البيت مبني كلنا نذتريبه
الله يحييكم معارف وخلان=ومن جالنا لا من دعانا نجيبه
حي الجواب وحي ذربين الايمان=ما هي غريبة من مذاخر عتيبه