جديدنا ليس عربي
والعتب على الفكر
صاحبي ما يدري إني عارفه وأعرف وصوفه=لو تستر بالعباة ولو تغطا باللثامه
الملامح بينه في مقعده والا وقوفه=ما تغيره الحياة وباقية حتى القيامه
يعربي باللسان وفيه لكنه في حروفه=الأثر واضح على ترحيبته والا سلامه
فارسي الدم من رجله ليا عالي كتوفه=من حلاه تشوف مخه لامعٍ داخل عظامه
آه من عينه وخده وآه من رقة كفوفه=شامخ مثل السراة وساخنٍ(ن)مثل تهامه
لو لبس لبس العرب والا تفنن في لفوفه=ما تداريه البشوت ولا تغطيه العمامه
الحسن شاهد عليها كل عين بها تشوفه=أخذه حد النهاية بالأناقة والوسامه
فيه من لون الورود وفيه من حوا كسوفه=فيه من وصف الغزال وفيه من وصف الحمامه
مهرة من أرض فارس بالمخاطر(إ)محفوفه=رابية بين الحجاز ونجد لأطراف اليمامه
مهرة ما روضوها بعدها مهي معسوفه=ما تولوها مناعيرٍ(ن)يحبون القرامه
الأصيلة لا لقت فارس يروضها معروفه=من تعلاها توصله المعالي والزعامه
ياسعد منهو ملكها لين يروى من شفوفه=وإن توانى في طلبها ما جنا غير الملامه
يا حسوفة يا حسوفة والف مرة يا حسوفه=فارسية من بعد ما شفتها مابه سلامه
عقبت بالقلب جرح وعقبت بالفكر لوفه=قبلها مرتاح معرف لا حسوف ولا ندامة
صاحبي أعرفه وأعرف لهجته وأعرف وصوفه=لو تستر بالعباة ولو تغطا باللثامه