أسعدكم الله جميعا بكل خير
الأبيات بدون مقدمات
يابنت ياللي طيبها يغلب الطيب=رحنا وجينا والسوالف طرايف
يا بنت ياللي مابها من عذاريب=عذروبها فرقا عزيز الولايف
تبكي عليه وتشلع الكم والجيب=وتنوح من كثر الوله والحسايف
وانا بعد اعوي كما عوية الذيب=طواه جوعه ما لقا له خطايف
قلبي غدا من حب سيد الخراعيب=روح وأنا بالعين يابنت شايف
نهب فؤادي غصب غرو الرعابيب=غروٍ(ن)كساه الله بأحسن وصايف
ماله شبيهٍ(ن)بالعذارى بلا ريب=الحسن كامل فيه ماهو نصايف
ذوقه ولونه والأدب والتعاجيب=مجموعةٍ(ن)باللي بها القلب هايف
عيبه مكمل ما غزى ذاته العيب=قلبي لغيره بالمزايين عايف
هو راس مالي مطمعي والمكاسيب=لقيت فيه لخافقي كيف كايف
كرهت من بعده لزاد ومشاريب=ودي بشوفه لو دونه طوايف
لكن حداني حظ منحوس وصعيب=وأنا عليه من الملامات خايف
خايف عليه من العتب والمطاليب=وأخشى عليه من النفوس الضعايف
شوفته عندي طب من غير تطبيب=لجروح قلبٍ(ن)عذبته الرجايف
الرجل يمه عاشقة للمهاذيب=والعقل لأجله ما رفع للكلايف
أفرح ليا جاني بخطه مكاتيب=تطفي لهيب الشوق خلف النحايف
وأزعل ليا من قال:يومين بغيب=ما كنها إلا سنينٍ(ن)عجايف
يا شيب راسي منه ياشيب ياشيب=مقدر على فرقاك يا ماي وايف
يابنت ياللي طيبها يغلب الطيب=رحنا وجينا والسوالف طرايف