يالله إني طالبك من عقب ضيقه لإنفراجي=قرب اللي لن شكيت من الهوى يشفق عليه
سقم حالي ياعشري ما لقيت أنا علاجي=العلاج اللي يداوي ما يباع بصيدليـه
ماش غيرك واحدٍ(ن)يقدر يعدل لي مزاجي=أنت وحدك تملك علاجي وتعرف بالشكيه
علتي حبٍ(ن)تمكن بالحشا بالقلب لاجي=من سنين أون وجروح الهوى فيني عفيه
أتقلب كني اللي حانذينه فوق صاجي=ما حصلي ما تمنيته وجرح الشوق فيه
نار حبك واقدة بالقلب ما منها خراجي=والحطب دمي ولحمي والفكر وأعظم بليه
غيرةٍ(ن)بالروح فوقك من عدال ومن عواجي=خايف الدنيا تكدر خاطرك صبح وعشيه
يا بعد عمري وروحي أنت بالدنيا سراجي=لو فقدتك تظلم الدنيا على نفسٍ(ن)شقيه
مير تكفى لا تزود علتي هات إبتهاجي=مد حبل الوصل ما بيني وبينك بالسويه
الرسالة منك يا خلي تسكن لإنزعاجي=والتلاقي لو حصل فيه الشفا مية بميه
ذاك والله ياعشيري ينطلق منه الحجاجي=تضحك الدنيا بعيني والفرح عم البريه
وإن تعذر لا يصير الموت ما جاني مفاجي=تنحل عظامي وأموت من القهر والروح حيه
ذا نصيبي من غرامك بين يأس وبين راجي=أتمنى وأتعنى والوجع ماهو شويه
بحر حبك في خفوق كل ما يذكرك ماجي=والنتيجة يابعد عمري محدثك الضحيه
الحشا فيه إرتجاجي والفكر فيه إرتجاجي=والقصيد اللي نظمته فيك يعكس للقضيه
ما بقي لي من عمر بقضيه في هج وهجاجي=والتوالي عند ربك عالم بكل البريه
يالله إني طالبك رحمتك في صحو وسهاجي=تلطف بحالي وترحم حالتي قبل المنيه
ويالله إني طالبك من عقب ضيقه لإنفراجي=قرب اللي لن شكيت من الهوى يشفق عليه