أسعد الله أوقاتكم بالخير
الليلة جبت لكم هالأبيات علها تروق لكم او للبعض منكم
لا تنشديني ليش للحين سهران=الليل للشاعر رفيقٍ(ن)مسامر
أسج به وأبدل أوطان بوطان=أركب جموح الفكر ساعة ياسافر
أنسى الجسد واسبح على لحن الألحان=أقطع مسافاتٍ(ن)بليا تذاكر
أزور مضنوني على متن الأشجان=أنشد عن أحواله وينهي ويأمر
على فؤادٍ(ن)دايم الدوم ولهان=يشتاق له والشوق بلحيل كافر
ما يرحم المشتاق في كل الأحيان=يوجع قلوبٍ(ن)نادمتها المشاعر
خصٍ(ن)ليا كان الغلا حيل فتان=فعله علي أمضى من أفعال ساحر
سحرني بلونه وذوقه والأعيان=كل الذي أهواه بالزين وافر
اليا تكلم يصغي السمع بإمعان=كل كلمةٍ(ن)من شفة الذوق تأسر
واليا مشى صوت الخطا طبل فنان=يهتز منها العود ما فيه قاصر
كل المكان يصير جنه وبستان=من عطره الزاهي وريح المباخر
والوان لبسٍ(ن)متقنه كل إتقان=متناسقٍ(ن)مع قامته لون باهر
يزهى به الفستان وبدون فستان=أخطر على العاشق من أخطر مخاطر
كله على بعضه زمرد ومرجان=مكنون ما حول لسوق ومتاجر
وصلت في حبه ليا حد الإدمان=هذا الذي من باقي العمر فاكر
لأجل كذا بسهر على شأنه أزمان=وأصير شاعر لو ما كنت شاعر
لا تنشديني ليش للحين سهران=الليل للشاعر رفيقٍ(ن)مسامر