أسعدكم الله دنيا وأخرة
اليكم ما جادت به اللحظة عله يروق لكم
الأبيــــــــــــــــــــــــات
الصاحب اللي صحبته للمصالح=ياسرع مقباله وياسرع مقفاه
اليا بغا له حاجةِ(ن)جاك مادح=وليا نصيته في لزومك فغر فاه
بالوجه حلو وبالقفا مر مالح=لا بارك الله في مجيه وملفاه
عذر منه مالك بشرواه صالح=وجهه على ماقيل يشبه مقفاه
لا تعتزي به بالليال الكوالح=عده صفر على شمالٍ(ن)وتفاه
دور على اللي بالصراحة مصارح=اللي يمد لك الوفا لو تجفاه
لوهو زعيمٍ(ن)ما إشتقى بالمشالح=مايحقر الممدود لوكان ماأكفاه
يأخذ ويعطي والرجولة مرابح=اللي تبي يعطيك ماعنك أخفاه
ماقال:هذا مطلبٍ(ن)حيل فادح=مثل الدوا للجرح بأمر الله شفاه
الصاحب الفالح يصاحب لفالح=وإلا الردي صحبته كلمه على شفاه
الفرق واضح بالبشر والجوارح=ومنهو تذرى بوجه بارد فلا أدفاه
حتى المنازل تختلف بالمطارح=منزل رفيع ومنزل الريح تسفاه
قال المثل لابد تضوي سوارح=ومن لا تخير درب ممشاه يحفاه
الصاحب اللي صحبته للمصالح=ياسرع مقباله وياسرع مقفاه