الله يمسيكم بالخير والرضا
بدون مقدمات اليكم الأبيات
علها تروق لكم
وأول واحد يرد عليها اما مدحته وإلا هجيته
الخلاصة اليكم ما جادت به القريحة
مرت ثلاث أيام صعبة ثقيله=أثقل على الخفاق من شامخ طويق
الهم يطحن بالضلوع النحيله=والجرح ينزف من عروقٍ(ن)معاليق
عِقب غيابك يا يالعنود الأصيله=الدمع يذرف والمحاجر محاريق
راحت علومي من غيابك دبيله=الحلق ناشف ما لقا لين الريق
مواجعي عقب المغيبة جليله=أصفق بكفي كف من شدة الضيق
ماني بعارف للتواصل وسيله=ياصبر أنا ما عدت لك يوم بطيق
اون وأشكي للقصيد الخليه=وأدرى وأداري عن جميع المخاليق
مقهور مالي في مواصله حيله=ما سلوتي إلا لحون الطواريق
لا من ذكرت اللي وصوفه قليله=ونيت ونة طاعنينه مطاليق
ينخى بني عمه وسمو القبيله=تكفون يا ربعي لحقني ملاحيق
هاتوا لي اللي مالها من مثيله=بين العذارى شامخة منسب يليق
أمثالها بالناس نادر فصيله=بنت الأصول أهل الكرم والبياريق
بالديرة اللي ما غزتها رذيله=تلقونها ما بين سيهات وبقيق
فيها وصوفٍ(ن)نادرات وجميله=رمت فؤادي بالسهوم الزواريق
ما عاد يرضيني سواها بديله=فرقا وليف الروح يا ربع ما أطيق
لأجل غلاها بصنع المستحيله=يالله يا ربي عليك التوافيق
وهبتها روحٍ(ن)تحب الفضيله=أقدارنا بيدين رب المرازيق
اللي جمعنا من سنينٍ(ن)طويله=على الوفا والحب دايم مرافيق
والمقبلات من الليالي كفيلة=تجمع لشمل قلوب من عقب تفريق
مهما تمر سنين صعبة ثقيله=أثقل على الخفاق من شامخ طويق