يابنت انا مشتاق والشوق قتال=قلبي لحم ماهو صخر ما يليني
اردد الآهات وابني للامثال=أبيات شعر نسجها من حنيني
ماعاد به خاطر يعرج على البال=الا لقيتك فيه يا نور عيني
مشغول بك وانته على الغير ميّال=منته بداري عن سبائب ونيني
عائش على الاحلام في كل الاحوال=اقول يمكن يوم خلي يجيني
ماني بجرف للمقفين هيّال=ولاني براجي واحد(ن)ما يبيني
وان كان مالي عندكم شف وإقبال=دع السهر والسر بينك وبيني
وليا دعاني صاحبي جيت رحّال=اجيه لو انه بحصن(ن) حصيني
تكفي لنا ساعة من الوقت لو طال=ساعة هنا تسوى حياة السنيني
امسح على الخدين واداعب الخال=واضمها فوق الصدر باليديني
في غمرة النشوة تنحي لنا الشال=واحتار ما بين النهد والجبيني
تمسي مثل بدر(ن) توارى ورا خيال=وانا بحشاها مثل طفل(ن) جنيني
وتصبح مثل شمس(ن) غدا دونها ظلال=وانا مثل غصن(ن) نما من عريني
أذرف دموع العين تجري بهمّال=دمع الفرح ما هي دموع الحزيني
واقول كان انك تغير بك الحال=تكفين بنت الشوق لاتفضحيني
من لا يحفظ السر ماهو برجال=الود في نفسي حبيس(ن) دفيني
اكتم رموز الحب عن كل عذال=من خلقتي حافظ لزيني وشيني