اليوم أنا مريت مشفى المواساه=
ومريت متعمد لباب الطواري=
كرمان للي قبل عامين شفناه=
عليه من كل المحاسن مواري=
عوده ولونه والأدب لا عدمناه=
كله على بعضه مميز حضاري=
نسيت بعده ناس والترف ما أنساه=
وشلون بنسى رغبتي وإختياري=
لقيت فيه اللي حلومي تمناه=
تبعه قلبي واتجه له مساري=
واليوم جئت أدوره ما لقيناه=
بنفس المكان اللي جمعنا عصاري=
جئت المكان يجدد القلب ذكراه=
وأنا قبل ما أجيه واثق وداري=
إن الزمن وظروف الأيام تحداه=
ممنوع من شوفي بالأمر الوزاري=
عزاه يا قلب العنا والف عزاه=
الى متى بصبر واخبي واداري=
وشلون بصبر في زماني لفرقاه=
اهون من فراقه وكاد انتحاري=
ياعل كل البيض بالوقت تفداه=
سيد العذارى بالحضر والبراري=
عسى الرزايا والمنايا تعداه=
من عقب صار اليوم بحبال غاري=
ضاع الرجا واليأس زاد المعاناه=
ما عاد ينفع بي كثر اصطباري=
القهر حوط داني القلب وأقصاه=
ما هو بعيد ادخل لقسم الطواري=