ليت القلم يكتب علـى مـدّ شوفـي=ويترجم إحساسي فصاحـة وتعبيـر
وليت الشعر ياسيّـد الخلـق يوفـي=ويكون له في داخل النفـس تأثيـر
إليا طرى اسمك ياسعـادة حروفـي=الحرف من زود الفـرح ودّه يطيـر
يارحمة الـرب الغفـور الرؤوفـي=للجن والأنس أرسلك سايق الخيـر
ياليتهـا لمسـت كفوفـك كفـوفـي=وياليتني من صحبتك ف المسافيـر
والله إن حبك ساكن (ن) وسط جوفي=لو كلّي ذنـوب وجهالـة وتقصيـر
شوفتك بشـرى للفـؤاد الشغوفـي=ليتك تجي تشرق بك الروح وتنيـر
أيقظ منامـي بـدّد انـواع خوفـي=طيفك شعاع يعطر النفـس تعطيـر
ياسيـدي غايـة منـاي وشفوفـي=جيرتك في الفردوس لاغير.. لاغير
ياتاج راسـي ياعظيـم الوصوفـي=ياخير هادي يـا شهيـر المشاهيـر
ياخير من ضافوا عليـه الضيوفـي=وياخير من ساق الامـل والتباشيـر
ياناصر الحـق وعويـن الضعوفـي=ياهادم اصنـام البـدع والأساطيـر
اذا تكلّـم فـيـك خـبـلٍ لقـوفـي=وصوّرك في بعض المجلات تصوير
لنصرتك ناقف صفـوف وصفوفـي=نذب عن عرضك حشـود وطوابيـر
بالديـن دونـك والقلـم والسيوفـي=ف وجيه الأنذال العلـوج الخنازيـر
ويارب توبـة قبـل تدنـي حتوفـي=وحط لي في ظلمـة القبـر تنويـر
نهار تتعـب مـن ذنوبـي كتوفـي=ارحم ودبرّنـي علـى خيـر تدبيـر
واغفر لعبدك فـي نهـار الوقوفـي=وطهّرني من الشرك والكفر تطهيـر
وصلاة من ربـي الـوف والوفـي=علـى رسـول الله ماغـرد الطيـر
الشاعر :هلال العتيبي