الليلة الفكر فره مثل فر التروس=هواجس ٍ(ن)مختلف في ليلتي دقها
هواجس الشوق قامت مثل حرب البسوس=تطعن حلوم الغرام وتطعن لحقها
لا تجرحين المشاعر يا بنات الهجوس=مشاعر العشق ناشف من عطش حلقها
الشعر بركان ثاير والمشاعر يبوس=وبل السحابة تعدى ما سقا عرقها
الشعر دينه مخالف مثل دين المجوس=يعبد لنار الغرام اللي قوي حرقها
والقلب بعده بغية ما فهم للدروس=اللي تحده على اللوعات في خقها
ياليل حظي علامه في زماني عبوس=ما يرحم النفس بعد إن الهوى شقها
كني من الوجد بالع مع شرابي لموس=الليل كله عيوني لامع ٍ(ن)برقها
ابدع بيوت القصائد والأماني عسوس=تجلب لحون القصيد اللي سرى طرقها
ياليل سهم الهِوى خلف الضلوع مغروس=والعين عيت تنام وغربها شرقها
طول السهر ينخر لحالي مثل نخر سوس=والعشق مثل السياسة موهت صدقِها
مقدر ابينه تحسدني عليه النجوس=ولا أقدر اخبيه روحي عاشقه عشقها
الليلة الفكر فره مثل فر التروس=هواجس ٍ(ن)مختلف في ليلتي دقها