يا مرحبا عداد ما هلت هماليل الخيال=وعداد ما نبت بعد وبل المطر زهر ونبات
الله يحيي ربعنا وأصحابنا قول وفعال=والله يحيي للعواني بالحلال النايفــات
الله يحيي للزميل وللعمام وللخوال=والله يحيي للجميع بدون تحديد الجهــات
في حفل عبدالله نرحب بالشيوخ وبالعيال=عداد ما لبى ملبي يوم وقفة بعرفات
الليلة اللي جمعتكم يا كريمين السبال=تسوى الليال الماضية مع الليال المقبلات
حياكم الله وإقلطوا على مباهير الدلال=والعود الأزرق نحرقه لعيونكم بالمجمرات
هذي مواجيب الرجال اليا لفوا عند الرجال=الكيف والترحيب عربون الكرم والموجبات
من عقبها ننقل صحون الحيل والسمن المسال=نسكبه فوق كفوفكم عاداتنا من وقت فات
ماجوبكم يا ضيوفنا نرخص لكم غال الريال=واجبك يا ضيف المحل قدام كل الواجبات
الضيف حقه عندنا ما ننقصه هذا محال=الدين وصى به وعادات القرون الماضيات
مقصودنا ننشد بياض الوجه في كل احتفال=الله يجملنا مع اللي مثلكم بالطيبات
والمعذرة ياضيوفنا لن صار بالحفل إختلال=ما قصدنا إلا الكمال ولا نبا للمنقدات
حنا كذا نبا الكمال وربنا رب الكمال=الله وحده مكتمل بأفضل تدابير وصفات
يا مرحبا عداد ما هلت هماليل الخيال=وعداد ما نبت بعد وبل المطر زهر ونبات