لقيت لي بالمنتدى قصيدة(ن)مضرب مثل=لو قسمت على قلوب أهل القصيد تسدها
قصيدة(ن)جزلة ومعناها من الشاعر جزل=فيها النقا فيها الصفا باللي عشقها ردها
ماهي بعارية من أفكاره محكمها بعقل=شفوق في معناه شفق أم الوليد لولدها
يعلن تحدي للعواصف قال:أنا ماني سهل=مثل الجبال الراسية ما ينعرف وش سدها
يا صاحبي خل التحدي وأذكر الله وإبتهل=ترى العواصف ما تودك لو بغيت تودها
اليا إستهلت وأبرقت عقب عواصفها وبل=في حينها يا قدرة الله لا تموت بصردها
إن كان هزك من تجمل بالمكاحل وإكتحل=هذي بدايتها وقل لي وش تمنى بعدها
اللي يبا حلو العسل يصبر للسعات النحل=ولا كل عين(ن)تجذب الأنظار للي لدها
من هو تعود للذهب ما يجذبه لمع الهلل=ياكود من حظه ردي والا قليل(ن)كدها
ليا بركت أبرك جمل وليا سرقت أسرق جمل=قالوه بالأمثال والعراف تعرف قدها
يلي تردد بالمثايل إسمع أقوال الكهل=من كان في نعمة وجحدها بيلقى ضدها
هذا جوابي تسمعه أخذه والا خل خل=هذي قصيده في قصيدة هاتها ثم ودها
ترى المعاني خيرها ما قل يا عيضه ودل=جتني قصيدة وحده وبنتظر وش بعدها