هواك دك القلب يا فاتني دك=يا مشعلٍ(ن)نار الهوى بالحنايا
إن كان في حبي تعاني من الشك=قرب لخدك وأختمه بالشفايا
بثبت لك إني يابعد خافقي الك=قلبي ودمي والفعل والنوايـا
فتحت لك قلبي وعقلي وأراهنك=مافيه غيري من يحبك كمايا
وأحلف لك برب البشر مالك الملك=ما فيه غيرك في خفوقي صبايا
قفلت باب العشق ما عاد ينفك=وأعطيتك المفتاح غاية منايا
خلاص قلبي عن هوى البيض منصك=إلا أنت يا ساحر ببيض الثنايا
أنا وقلبي للغلا كلنا ملك=قدمتها لأجل المحبة هدايا
قلبي بحبك صار يا غايتي بنك=يا غاية مرادي وغاية هنايا
جئتك من أقصى الشوق ياشوق زابنك=شايل جروحي وأتمنى دوايا
هذا أنا واضح ولاني مداهنك=أجمل ليال العمر وأنتِ(ي)معايا
وإن كان بي جنون جني ترى منك=حبك مسوي في حياتي سوايا
شوفي قصيدي وش يسوي بباطنك=ترى القصائد مثل وجه المرايا
تكشف لك المستور في ريحة المسك=اللي تناثر في جميع الزوايا
هواك دك القلب يا فاتني دك=يا مشعلٍ(ن)نار الهوى بالحنايا