الصورة اللي جات سوت سوايا=في قلب شاعر ذكرته بوليفه
جتني هدية يا حلاة الهدايا=أخذت من التفكر مني نصيفه
مرسولةٍ(ن)من عند عذب السجايا=مختارها تعبير من كيف كيفه
مملوحةٍ(ن)فيها جمال ومزايا=الخد وردي والأصابع رهيفه
من شفتها ذكرت غاية منايا=عيني عن الزينات بعده كفيفه
هو منيتي ما دمت حي وهوايا=عاهده قلبي ما يخونه حليفه
هو مطلبي هو راحتي هو شقايا=البيض بعده ما تساوي تعريفه
من بعدها سلام وأطيب تحايا=عليك يا بنت الرجال العفيفه
ما بيننا يابنت حسن النوايا=أنتي شريفة والنوايا شريفه
يا نور صبحي والضيا في مسايا=سلمت يمينك والقلوب النظيفه
هديتك جتني وهذا جزايا=قصيدةٍ(ن)مني جميلة طريفه
نأخذ وتعطي من جزيل العطايا=ما نلحق الممدود مَن وحسيفه
لو القلوب اللي بخلف الحنايا=تشتاق ترجع بالشهامة عسيفه
ما نشرب إلا من عدودٍ(ن)رهايا=شرب الروى من غير لوم وكسيفه
الود ما نجلبه بيع وشرايا=أرواحنا دون الشكاله عنيفه
قدنا على شأن الرجولة سرايا=بالعزم نردع للنفوس الضعيفه
الله يعدي عنك كل الرزايا=والمعذرة لن كان فيها كليفة
خليك حولي من جميع الزايا=أما ملك للشعر وإلا وصيفه
كوني لشعري والقصائد مرايا=لا تتركين القلب يحرقه صيفه
والله يعلم بالجهر والخفايا=عسى الهنا دايم لهمك خليفه
يا صورةٍ(ن)سوت بقلبي سوايا=قلبي رهيف و ذكرته بوليفه