تجمل حبيبي واتصل لا عدمت الصوت=سماعي لصوتك يشرح الصدر يا غالي
يفرج لهمٍ(ن)بالصدر بالزمن مكبوت=مواجيع حبٍ(ن)قاسية مرها حالي
غرامٍ(ن)قديمٍ(ن)بالحشا يالغلا منحوت=تعاقب عليه سنين وأيام وليالي
غرامٍ(ن)بنا له بالحشا من زمان بيوت=وسخرت له كل المشاعر ولا أبالي
رفيق العمر من مبتدأ الحب لين الموت=يزيد الهوى والعمر ينزل من العالي
تمنيت نهنا قبل حلو الزمان يفوت=لكن يا حسافة ضاع ...الأول مع التالي
تون المشاعر في صدر كنه التابوت=عليها قيودٍ(ن)صعب في يوم تنزالي
تصيح القصايد والعواطف تموت سكوت=ليا هزها من جاير الشوق زلزالي
يابو مبسمٍ(ن)لونه يشابه ثمار التوت=وباقي حلاك معقبٍ(ن)فيني هبالي
الآ ليتني وإياك كنا كبار بخوت=لكن حظنا المنحوس ضيع لي آمالي
على باب يأسي طاح حلو الأمل مفتوت=وتاهت هواجيسٍ(ن)قبل تخطر لبالي
لهمها الزمن ما كنه إلا لفرحي حوت=أخذها وبدلني بها جمري الصالي
حلوم القلوب اليانعة بالعقول تموت=عليها حمول القهر بالكوم تنهالي
رحل كل زين وحل بي قهري الساحوت =وضاق الصدر ماعاد للصبر منزالي
بقا لي من الأمال صوتك لروحي قوت=ليا من سمعته بعض الأوجاع تنشالي
تجمل حبيبي واتصل لا عدمت الصوت=سماعي لصوتك يشرح الصدر يا غالي