تنام وطرف عيني ساهرٍ(ن)ماذاق طعم النوم=أسامر للطيوف اللي تساهرني ولا نامت
وهذي عادتي ماهي بذا الليله وهذا اليوم=عيوني عاشقة ليل السهر عن نومها صامت
تلاعب بي طيور الفكر دايم بالهجوس تحوم=ويتبعها هوى قلبي ليا من بالأمل حامت
رجاوي في وصالك لو دونك حايلات هموم=ولاني لايمٍ(ن)روحٍ(ن)بودك يا غلا هامت
أرتب للمواصل والتواصل والفكر مقسموم=ما بين يصير وإلا مايصير أحلامي إنضامت
أفكر بالسعادة معك وأشرب بُعدي المسموم=وزفرات الصدر من حر ما بالصدر مانلامت
أون من الجروح اللي تسامر حظي المكلوم=وأعشمها ببكرة والليال بحال ما دامت
أبصبر وأتصبر والأمل بحرٍ(ن)عليه نعوم=أمانينا مراكبنا على موج البحر عامت
صواريها مشاعرنا وعصفات الرياح حلوم=ليا هبت عليها من رصيف أشواقنا قامت
تقرب للمسافة بيننا مع دربنا المرسوم=تحيد للعنا وتجهز الأفراح لن رامت
لها تطرب قصايدنا ويصبح شكها مفهوم=ليا حل التلاقي عن جميع ظنونها شامت
عسى ربي يحقق للأماني والحظوظ سهوم=ليا انقادت عسيرات الظروف تموت ما زامت
تنام العين من عقب السهر وتذوق طعم النوم=وترتاح الطيوف اللي تساهرني ولا نامت