ليه يالليل الوله ترحل قبل تروي عطشنا=مع رحيلك ينتحر حلمي على وجه الحقيقه
جفت شفاه الأمل من بعد لحظات أنتعشنا=اختنق صوتي وحل بداخل المجروح ضيقه
ليه ياليل العنا ترحل بعد حنا فرشنا=للمشاعر وجهك المكلوم بورودٍ عبيقه
ليه تحرمنا من النشوة بعد فيها ارتعشنا=وانبلج فجر المواجع والجروح اللي عميقه
من سنين طوال تنزف لين فيهن ابتلشنا=كل ما قلنا يطيب الجروح جا شيءٍ(ن)يعيقه
وإن تخدرنا دقائق هالزمن فيها نكشنا=لين يشعل بالحنايا من توجدنا حريقه
ليه يا ليل العنا دائم تعمد في غششنا=تسجن الأحلام والأوهام تتركها طليقه
نبني قصور وممالك ثم نصبح في عششنا=جامعين الهم كله من تجاربنا العتيقه
كل ما قلنا تزين أحوالنا يكبر عمشنا=القهر واليأس دايم مع هواجسنا لصيقه
آه يا كبر المأسي ما تصورها ريشنا=ما لقينا للهموم حلول يا صعب الطريقه
كل ما نسلك طريقة حظنا العاثر كرشنا=لين نرجع بالبداية في مهاوينا السحيقه
عود يالليل الأمل نروي قبل ترحل عطشنا=قبل حلمي ينتحر ياليل في وجه الحقيقه

المشاركة الأصلية كتبت بواسطة الشاعره همس الغيث (المشاركة 120466) صح لسانك يافارس القوافي ليتك ياليل الامل تعود ويصبح الحلم حقيقه